雙聲道中Michael嘅文章，Updated 2008.11.26 結婚

自在

我好中意Michael喺節目中嘅文章，好懷念“網上情”。我將Michael喺節目中嘅文章打咗出嚟，希望同同樣中意呢個部分嘅聽眾一齊分享。

2008年7月20日 第一集
        大家好，我係梁繼璋。你重記唔記得我呢？
        呢一句說話，呢一個題目，正正係我今晚開咪前嘅心情。離開咗電臺有半年，喺呢個節奏咁快嘅香港，有幾多個人重會記得我呢一個小小DJ？－一個曾經喺咪前默默工作十幾二十年嘅人。
       每日有唔少人喺身邊行過，眞正記得嘅，可能不到百份之一。要能夠令你記住，可能你會中意佢，亦可能你好憎佢，可能佢已經同你冇乜瓜葛，冇乜喜惡嘞，一早抛諸腦後。如果你記得梁繼璋係因為你喜歡我嘅節目嘅，我講一聲多謝。如果你記得我係因為憎我嘅話，我都要多謝你。喺百忙之中都喺心度留低呢個位畀我，浪費咁多心力喺一個咁唔中意嘅人身上。
       以前睇過一套戲叫《半支煙》，曾志偉飾演嘅豹哥身邊永遠藏住半支煙，代表咗一段唔可以忘記嘅愛情。豹哥嘅記憶力越嚟越差嘞，佢想喺呢段記憶未完全消失之前再見情人一面。呢種感覺，呢種心情我都試過。難以忘記嘅人，難以忘記嘅生活，原來一轉眼已經成為過去，想牢牢噉將佢捉住，但係原來時間係會同人作對，越唔想忘記，越容易忘記。試過有一次有記者訪問我，佢問，吓梁繼璋你做咗電臺咁多年，最難忘嘅係咩事？當時我諗咗好耐都答唔出。十幾二十年喺電臺做，呢啲生活好似一陣煙噉樣話走就走。
       又記得好多年前，有一個分咗手一段時間嘅女朋友，有一日寫咗封信畀我。內空係話：我驚你會忘記我啊，所以我好自私噉寫呢封信畀你，希望你仍然記得我。但係我又想你忘記我，因為我永遠唔再返嚟你身邊。
       其實佢唔知道，忘記唔忘記一個人，唔係由我哋去話。有啲人我想記住，我都記唔到。有啲人我想忘記，都唔容易。喺呢個平常不過嘅星期日晚，我又喺咪前嗰度講嘢。聼緊呢個節目嘅你，記唔記得我個名？記唔記得我做過嘅節目？

2008年7月27日 第二集
       喺你嘅相簿裏便，有冇一張相係非常珍貴而又非常喜歡嘅呢？呢張相珍貴嘅地方又係乜嘢？現代人影相已經去到氾濫嘅地步，由於數碼機非常之盛行，影一張，影十張，影一百張基本上冇乜分別。唔同以前，記得細個嘅時候影相，每張菲林都要數清楚，因爲每張菲林都係錢。而家唔同囉，係又影，唔係又影，喜歡嘅咪保留喺電腦度得閑睇下囉。唔中意呀？撳個掣，即刻唔見咗。
       正因爲噉，我哋嘅電腦有無數爲影而影嘅相，到此一遊嘅相，一家人求祈坐埋影嘅相。影完之後，幾耐會攞出嚟睇下？好少。因爲呢啲景，呢啲人，隨時都可以擁有，隨時都揾得到，冇乜特別保存價值。直至若干年之後，你會發覺相中人已經唔再喺身邊，相中人有啲可能已經由牙牙學語嘅小BB，變成“一言九頂”嘅叛逆青年。相中嘅人變咗，景物亦都隨時日而改變。往日青蔥嘅草地而家可能係高聳入雲嘅大廈，以前釣魚人仕聚居嘅一個碼頭，可能已經塡成一片黃土地，準備興建石屎森林。到咗嗰個時候，呢啲照片就會成爲你嘅紀念品，每一張都刻劃住無可找尋嘅人，無可記錄嘅景。相片中捕捉到嘅每一刻，都帶嚟一種無奈嘅懷念，無奈嘅心痛。
       我曾經欣賞過布吉島迷人嘅落日，我曾經欣賞過離島嘅濤天巨浪。喺睇嗰陣，我以爲佢哋已經係最美麗嘅一刻。直至我睇返細個嘅時候家庭生活照，睇返阿爸，睇返阿媽，睇返一家人，每一張載滿感情、思念。最重要嘅係每一張相都再揾唔到，再拍攝唔到。太陽會再昇起，大浪會再拍岸。身邊嘅人先係相片之中最重要嘅元素。有咗呢啲心愛嘅人，每一張照片先有值得保存嘅價值。
       我欣賞煙花嘅璀璨，我欣賞天空嘅蔚藍，我欣賞一切一閃即逝，或者係歷久常新嘅事物，但係我更加欣賞喺景物裏便，相裏便陪我行過人生嘅每一個人。有咗佢哋，任何一刻都可以係最愛嘅一刻。

2008年8月3日 第三集
    你好！可能你會奇怪，點解一個你唔認識嘅人無端端會寫呢封信畀你？其實就連我自己都覺得奇怪。點解我會夠膽向一個完全唔識嘅人寫我心裏便嘅感受？
    自細我就係一個比較內向，比較怕醜嘅人。喜歡乜嘢，唔喜歡乜嘢，除非係對住好熟嘅人或者父母，如果唔係，我係唔會貿貿然講出嚟，因爲我驚畀人拒絕。所以我寧愿唔做任何行動，總勝過失望而回。
    中學時候嘅我係讀全男校，所以喺同女仔相處方面更加不知所措。比如話點樣打開話匣？點樣問佢個聯絡電話？點樣約佢去街？點樣話畀佢聽我中意佢？呢啲對於我嚟講，都係難過人類登陸月球嘅課題。所以入咗呢一間大專院校，我通常都係獨來獨往，識唔到人，更加識唔到異性嘅朋友。
    嗰日，踏入課室上第一堂嘅中國語文，係一個必修科，班上嘅同學來自不同嘅系別。亦都喺嗰日，我第一次睇見你。從你同朋友嘅對話之中，我知道你係讀商業管理嘅。你清爽純樸嘅髮型，笑起上嚟兩隻眼矇成一線嘅表情，都叫我唔能夠將視線挪開。我見到你身邊經常圍住一大班嘅男同學，就好似一班蜜蜂圍住一朵鮮花一樣，我就知道你係一個非常受異性歡迎嘅女仔。相比佢哋，我更覺得自己好似冇用，好唔爭氣吖。祇係識得暗暗用眼睛睇住你嘅一舉一動，一齊喺個班房嘞，連“早晨”、“拜拜”呢啲咁普通嘅說話都唔夠膽講。
    後來，我千方百計喺老師嘅點名簿度睇到你個全名，哦！原來係呢個名。跟住，我一得閒就喺自己啲拍子簿度寫你個名。寫完一張紙，又寫第二張紙。中文、英文寫完又寫。然後將嗰啲紙折成飛機，向天空掟去。寫咗好多次啊！所以你嘅中文名、英文名我到而家都重記得好清楚。呢個愛情嘅白日夢我發咗整整一個禮拜。唔係，應該話係一個學期。然後課程完結，我冇再喺學校撞到你嘞。係你同我嘅上堂時間唔啱？撞唔到？定係你已經去咗外國升學？我冇辦法知道。
    呢封信，我足足遲咗三十年先夠膽寫。雖然今日你已經睇唔到，我諗我會將呢封信點用呢？或者會好似以前噉，將佢折成一架紙飛機向天空嗰度掟去。希望風可以將佢帶去你身邊，帶去三十年前，當我重係一個大學生嘅時候。我而家知道嘞，愛一個人要用心，感動一個人要用行動。世界上任何事情都有一個時效，愛情都唔例外。過咗有效日期，一切都會祇成爲不可改變嘅歷史。
    一個默默愛你嘅人，三十年後寫嘅一封情信。

2008年8月10日 第四集
http://www.hkreporter.com/talks/viewthread.php?tid=235985&page=2#pid2418901

2008年8月17日 第五集
http://www.hkreporter.com/talks/viewthread.php?tid=235985&page=2#pid2418911

2008年8月24日 第六集
http://www.hkreporter.com/talks/viewthread.php?tid=235985&page=3#pid2448418

2008年8月31日 第七集
http://www.hkreporter.com/talks/viewthread.php?tid=235985&page=3#pid2453880

2008年9月6日 第八集
http://www.hkreporter.com/talks/viewthread.php?tid=235985&page=3#pid2453885

2008年9月13日 第九集
http://www.hkreporter.com/talks/viewthread.php?tid=235985&page=3#pid2470279

2008年9月21日 第十集
http://www.hkreporter.com/talks/viewthread.php?tid=235985&page=4#pid2483095

2008年9月28日 第十一集
http://www.hkreporter.com/talks/viewthread.php?tid=235985&page=4#pid2490116

2008年10月5日 第十二集
http://www.hkreporter.com/talks/viewthread.php?tid=235985&page=5#pid2500460

2008年10月12日 第十三集
http://www.hkreporter.com/talks/viewthread.php?tid=235985&page=5#pid2511529

2008年10月15日 第十四集
http://www.hkreporter.com/talks/viewthread.php?tid=235985&page=6#pid2517599

多謝大家嘅支持，我已經將阿蕊嘅文章Post到
http://www.hkreporter.com/talks/viewthread.php?tid=236304&extra=page%3D1&frombbs=1
希望大家中意嘞！多謝！

由於字數限制，呢度冇辦法再添加link，十四集之後會直接Post到後面，希望各位唔好介意 。
好高興Michael有睇到呢個Post，多謝你同Sara爲大家做瘋騷！希望大家繼續支持瘋騷!!

[ 本帖最後由 自在 於 28-11-2008 22:57 編輯 ]

Yan

嘩...自在...你好有心呀!!!多謝你打出來..等我哋可以用文字再三回味

可人兒

多謝你自在..............................

wahsnowing

十分多謝!! 又可一再回未!

叮叮噹噹

thanks..自在.......................

man_zeta

先多謝樓主的一番努力! 萬謝!
但節目主持都有阿蕊的感性讀白,樓主不知可否辛苦一點,連阿蕊的感性讀白都一共列出共享,功德無量!

[ 本帖最後由 man_zeta 於 3-8-2008 13:36 編輯 ]

cammy147

多謝樓主花費時間將之用文字表達出來.
我覺得阿蕊的都很不錯的 "你記得我嗎?" ........ 我還在回未當中呢

angela283

多謝晒呀!!! ............

自在

man_zeta，cammy147你哋講嘅，其實都係我想做嘅。我都好中意阿蕊嘅獨白。我亦已經打咗出嚟，Post 咗係另一個貼，本來想加喺呢個帖度，不過我最後覺得分開兩個帖可能會清楚啲。
阿蕊嘅獨白喺呢度：
http://www.hkreporter.com/talks/ ... &extra=page%3D1
多謝你哋嘅支持，多謝大家嘅支持！

michellepro

thank you so much i like it 你好好呀.